გაგა ნიჟარაძე: "ბევრი ხალხი ერთ ადგილას არის სახიფათო"...

"რეზონანსი"

30 მაისი, 2009

"მიმაჩნია, რომ პატრიარქი არ უნდა ერეოდეს პოლიტიკურ პროცესებში"

"ჩანს, რომ ესენი ჩაჭიჭინებული არიან ხელისუფლებას და თავისით, ასე მარტივად, არ წავლენ, ვიღაც დასავლეთიდან თუ არ დაუკაკუნებს. დასავლეთს კი, ჩემი აზრით, ასეთი პოზიცია აქვს: "ეს კაცი არის ცუდი, მაგრამ ჩვენი ცუდია". და ჯერჯერობით, ვერ ხედავენ ალტერნატივას ჩასანაცვლებლად.
დასავლეთს სჭირდება, იყოს დარწმუნებული, რომ საქართველოს დასახმარებლად გამოყოფილი ოთხ-ნახევარი მილიარდი დოლარი არ წავა ვიღაცების ჯიბეში. ჯერჯერობით, ვფიქრობ, სააკაშვილის იმედი აქვს. მაგრამ, თუ გამოჩნდება უფრო სანდო ადამიანი, სააკაშვილი გადადგება.
ჭორის დონეზე ვიცი, რომ ხელისუფლებას დაქირავებული ჰყავს ძალიან მაღალკვალიფიციური უცხოელი კონსულტანტები და მათ გეგმას მიჰყვება: რომ ეს პროცესი თავისით უნდა ჩაცხრეს თუ რაღაც ასეთი... მაგრამ აქ ყოველთვის ფლუქტუაციებია მოსალოდნელი. რა მოხდება, ამის თქმა შეუძლებლია. ბევრი ხალხი ერთ ადგილას არის სახიფათო", - "რეზონანსს" ფსიქოლოგი გაგა ნიჟარაძე ესაუბრა.

- როგორ აფასებთ საქართველოს კათალიკოს-პატრიარქის განცხადებას - რომ "ხელისუფლებამ ქმედითი ნაბიჯები უნდა გადადგას დაძაბულობის განმუხტვისთვის, იქნება ეს რიგგარეშე არჩევნები, მოლაპარაკებები თუ სხვა"?
- მიმაჩნია, რომ პატრიარქი არ უნდა ერეოდეს პოლიტიკურ პროცესებში.
- 26-ში, საღამოს, ოპოზიციის ლიდერებს ხალხის მართვა გაუჭირდათ. ეს, თქვენი აზრით, რამ გამოიწვია? უნდა წასულიყო თუ არა ხალხი სტადიონზე გამართული აქციის შემდეგ სამების ტაძარში?
- უნდა წასულიყვნენ თუ არა, ეს მათი გადასაწყვეტი იყო. მთავარია შედეგი.
მასა ყოველთვის საშიშია. როდესაც ორი თვის განმავლობაში ასეთი მასობრივი აქციები მიმდინარეობს, ბუნებრივია, რაღაც ინციდენტებიც მოხდება - როგორც ეს მოხდა პოლიციის სამმართველოსთან - აქცია თუ, რაც გინდათ, დაარქვით, რომელზეც ოპოზიციამ, ჩემი აზრით, თავისი წილი პასუხისმგებლობა უნდა აიღოს. არ უნდა მომხდარიყო ასეთი რამ. მადლობა ღმერთს, გადავრჩით მაშინაც.
- თქვენ ამბობთ, რომ სამმართველოსთან არ უნდა მისულიყვნენ?
- რა თქმა უნდა, არა. ყოველ შემთხვევაში, არ უნდა ეცადათ კარების შემტვრევა.
- მაგრამ ოპოზიციის ლიდერები ამბობენ: ჩვენ მოვუწოდებდით ხალხს, უკან დაეხიათო. და ეს კადრებშიც ჩანს.
- უნდა განსაზღვრო: მართავ თუ ვერ მართავ.
- მათ აქვთ არგუმენტი: "სხვანაირად ის ბავშვები ვერ გათავისუფლდებოდნენ".
- არ ვიცი, გათავისუფლდებოდნენ თუ არა. ძალიან არ მიყვარს ეს ხელისუფლება, მაგრამ არ მომწონს ოპოზიციაც. და, ჩემი აზრით, ეს არის თავი და თავი დღევანდელი კონფლიქტის. საზოგადოების დიდმა ნაწილმა იცის, რომ ეს ხელისუფლება არ ვარგა, მაგრამ არ მოსწონს ის, ვისაც პრეტენზია აქვს, რომ მათ ჩაენაცვლებიან. ეს არის ყველაზე სერიოზული პრობლემა.
პირადად მე შედარებით სიმპათიით ვარ განწყობილი "ალიანსი საქართველოსთვის" მიმართ. წინდახედულ და გონივრულ გადაწყვეტილებებს იღებენ.
- ალასანიამ და მისმა გუნდმა უარი თქვა გზების, მაგისტრალების გადაკეტვაში მონაწილეობაზე. გარდა ამისა, ის კონკრეტული და არა პერმანენტული აქციების მომხრეა. თქვენ, ალბათ, კარგად იცნობთ სააკაშვილის ფსიქოტიპს და ზოგადად, ამ რეჟიმს. მოახდენს თუ არა გავლენას ასეთი ტაქტიკა რეჟიმის ცვლილებაზე?
- არ ვიცი. ჩანს, რომ ესენი ჩაჭიჭინებული არიან ხელისუფლებას და თავისით, ასე მარტივად, არ წავლენ, ვიღაც დასავლეთიდან თუ არ დაუკაკუნებს. დასავლეთს კი, ჩემი აზრით, ასეთი პოზიცია აქვს: "ეს კაცი არის ცუდი, მაგრამ ჩვენი ცუდია". და ჯერჯერობით, ვერ ხედავენ ალტერნატივას ჩასანაცვლებლად.
- თქვენი აზრით, სააკაშვილი მოლაპარაკებეზე წამოვა?
- ვერ გეტყვით. სააკაშვილი ძალზე რთულად პროგნოზირებადი ადამიანია. როდესაც ქვეყანაში ასეთი მდგომარეობაა, ქუჩაში ასი ათასი ადამიანია და კაცი ფეხბურთის საყურებლად მიდის... მაგრამ აქ არის ერთი ძალიან მნიშვნელოვანი ფაქტორი - დასავლეთის ფაქტორი. დასავლეთს სჭირდება, იყოს დარწმუნებული, რომ საქართველოს დასახმარებლად გამოყოფილი ოთხ-ნახევარი მილიარდი დოლარი არ წავა ვიღაცების ჯიბეში. ჯერჯერობით, ვფიქრობ, სააკაშვილის იმედი აქვს. მაგრამ, თუ გამოჩნდება უფრო სანდო ადამიანი, სააკაშვილი გადადგება.
- ე.ი. ყველაფერი მაინც დასალეთის ნებაზეა დამოკიდებული?
- ყველაფერი არა, მაგრამ ბევრი რამ. ოთხ-ნახევარი მილიარდი ძალიან დიდი ფულია.
- როგორ აფასებთ ოპოზიციის ცალკეული ძალების გადაწყვეტილებას, იმოქმედონ ინდივიდუალური ტაქტიკური გადაწყვეტილებების საფუძველზე? საზოგადოების დაკვეთა, თქვენი დაკვირვებით, რა არის?
- მწვავე პროცესი გადავიდა ქრონიკულ ფაზაში. მე არ ვიცი, რა არის უმჯობესი პოლიტიკური თვალსაზრისით: საერთო ტაქტიკით მოქმედება თუ ცალ-ცალკე, ინდივიდუალური ნაბიჯებით. საერთოდ, ოპოზიციის აქციებმა, ჩემი აზრით, დაკარგეს კრეატიულობა: არაფერი ახალი არ ხდება; და ეს ბეზრდება ადამიანს, რამდენადაც სიმპათიით იყოს განწყობილი. ყოველთვის ასეა. წინასწარ ძნელია იმის თქმა, გამოაცოცხლებს თუ არა პროცესს, თუკი ისინი ინდივიდუალურად რამე ახალს შესთავაზებენ ადამიანებს.
საზოგადოებას კი, უბრალოდ, სტაბილურობა უნდა. ასეთი არანორამლური მდგომარეობა არ შეიძლება დიდხანს გაგრძელდეს. ბოლოს და ბოლოს, თვითონ ხალხს მოეშლება ნერვები. შეიძლება ამოხტეს ვიღაც სრულიად ახალი სახე და... მე ამის მეშინია: მეშინია საქართველოში კიდევ ერთი ქარიზმატული ლიდერის გაჩენის.
- დასავლეთი ამბობს, რომ ურჩევნია, დაელაპარაკოს ერთ ლიდერს. ეს შეიძლება ნიშნავდეს ქარიზმატულ ლიდერსაც?
- ეს შეიძლება ნიშნავდეს ყველაზე გაწონასწორებულს, და ისეთს, რომელიც დაჯდება და მოუსმენს მეორე მხარეს - იმიტომ, რომ სააკაშვილსაც აქვს თავისი არგუმენტები. რაღაც დამსახურებები აქვს: ინფრასტრუქტურა, ქურდები, ასლან აბაშიძე... ყველას თავისი სიმართლე აქვს.
- თქვენი დაკვირვებით, არის თუ არა საზოგადოებაში მოთხოვნილება ერთ ლიდერზე?
- ზოგს უნდა, ზოგს - არა. ისეთებიც არიან, რომლებსაც სურთ, მთლიანად სხვას გადააბარონ თავიანთი თავისუფლება. მაგალითად, იმ დღეს ვიღაცამ დაურეკა გია გაჩეჩილაძეს, შენში სულიწმინდა არისო...
- მაგრამ თვითონ აბობს, რომ პოლიტიკაში ჩართვას არ აპირებს.
- დიახ, უფრო სულიერი ლიდერის დატვირთვა აქვს...
- თქვენი აზრით, რა როლს ანიჭებს გია გაჩეჩილაძეს ხელისუფლების მიმართ პროტესტით განწყობილი საზოგადოება?
- გია გაჩეჩილაძე გახდა, ასე ვთქვათ, ქუჩის ლიდერი, და ეკრანის.
- ქუჩის ლიდერი რას ნიშნავს?
- არაპოლიტიკური ლიდერი გახდა. ასე ვთქვათ, მასის ლიდერი. თავად მას, რამდენადაც ვიცი, პოლიტიკური ამბიციები არ აქვს, მაგრამ სერიოზულ ანგარიშგასაწევ ძალას წარმოადგენს. რა გითხრათ: ჩემი ლიდერი არ არის, მაგრამ ბევრის არის.
- შესაძლებელია თუ არა მოხდეს ისე, რომ მან პოლიტიკოსები ამ ბრძოლაში, ასე ვთქვათ, განზე გასწიოს?
- შესაძლებელია. ან, თუ გია არა, იქნება ვიღაც სხვა.
- ანუ, შეიძლება ეს კონკრეტულად გია გაჩეჩილაძე არც იყოს?
- დიახ, ეს შესაძლებელია.
შეიძლება მოვლენები ისე განვითარდეს, რომ გიას სხვა გამოსავალი არ დარჩეს. შესაძლოა ის გახდეს მძევალი თავისი პოზიციის, რაც ძალიან ცუდია - იმიტომ, რომ არავითარი პოლიტიკური გამოცდილება მას არ აქვს. მაგრამ, მეორე მხრივ, გიამ ძალიან სერიოზული როლი ითამაშა მიმდინარე პროცესებში ოპოზიციური როლის გაძლიერებისთვის.
- გია კრიალაშვილთან და, საერთოდ, მუხროვანთან დაკავშირებულ ამბავზე, თქვენი დაკვირვებით, საზოგადოებაში როგორი რეაქციაა?
- ბნელით მოცული საქმეა. მე ვინც ვიცი, არავის სჯერა, რომ მართლა იყო ამბოხის მცდელობა. და საერთოდ, თუ ასეთი ადამიანი მართლა არსებობს, თუ ის, რუსეთის დავალებით, გადატრიალებისთვის მუშაობს, ყველანაირად უნდა ეცადო, რომ არ მოკლა. თანაც, კრიალაშვილს სერიოზული დამსახურებები აქვს ქართული არმიისა და სახელმწიფოს წინაშე. ძალიან სერიოზული ეჭვები არსებობს, რომ, უბრალოდ, მოკლეს; განტევების ვაცად აქციეს. მეც ასეთი ეჭვი მაქვს, თუმცა ამაზე დარწმუნებით ვერ ვისაუბრებ.
- რა ლოგიკური დასასრული შეიძლება ჰქონდეს მიმდინარე პროცესებს? ზოგი ამბობს, რომ რევოლუცია გარდაუვალია.
- ღმერთმა დაგვიფაროს. რევოლუცია გარდაუვალი არ არის. საბოლოოდ, საღმა აზრმა უნდა გაიმარჯვოს. მაგრამ საქართველო ისეთი ქვეყანაა, რევოლუციაც შესაძლებელია... უფრო ვფიქრობ, რომ პრობლემა დასავლეთის ჩარევით გადაწყდება.
- როგორც ჩანს, სააკაშვილის ლობისტები ნაყოფიერად მუშაობენ: ეს დასავლურ პრესაშიც კარგად ჩანს. თქვენი აზრით, საითკენ მიჰყავს დასავლეთს პროცესი?
- ოპოზიციამ ვერ გამოავლინა თავისი ძალა - იმიტომ, რომ ოპოზიციონერების 80%, უბრალოდ, არ არის გარკვეული პოლიტიკაში. იციან მიტინგი, მაგრამ რა არის რეალური პოლიტიკა, არ იციან. სააკაშვილის ერთ-ერთი კოზირი არის ის, რომ მრავალჯერ აჩვენა თავისი პროდასავლური განწყობა. დანარჩენებმა, როგორც ჩანს, ეს ვერ აჩვენეს.
იური აფანასიევი წერდა "ნოვაია გაზეტაში": საქართველო შეიძლება გადაიქცეს "საფრონტო ქვეყნად" დასავლეთსა და რუსეთს შორისო. არსებობს რაღაც ობიექტური რეალობები, რომლებსაც ანგარიში უნდა გაუწიო. შენი ქვეყნის მართვა არ ნიშნავს თვითნებობას. უნდა მოახერხო მოქმედ ფაქტორებს შორის ყველაზე ოპტიმალური გზის მოძებნა.
დასავლეთი დარწმუნებული უნდა იყოს, რომ ის ადამიანი, ვინც აქ იქნება, მისი კაცია. და ამისთვის ინგლისური მაინც უნდა იცოდე. ინგლისური სააკაშვილმაც იცის, მაგრამ ამასთან, სააკაშვილი არწმუნებს დასავლეთს თავის პროდასავლურობაში.
- და ეს ბოლო მოვლენებმაც დაადასტურა, თქვენი აზრით?
- ყოველ შემთხვევაში, დასავლეთს სააკაშვილი თავის კაცად მიაჩნია. სხვებში, ალბათ, არ არის დარწმუნებული. ან არ მიაჩნია საკმარისად ძლიერ ფიგურად. ჭორის დონეზე ვიცი, რომ ხელისუფლებას დაქირავებული ჰყავს ძალიან მაღალკვალიფიციური უცხოელი კონსულტანტები და მათ გეგმას მიჰყვება: რომ ეს პროცესი თავისით უნდა ჩაცხრეს თუ რაღაც ასეთი... მაგრამ აქ ყოველთვის ფლუქტუაციებია მოსალოდნელი. რა მოხდება, ამის თქმა შეუძლებლია. ბევრი ხალხი ერთ ადგილას არის სახიფათო.
- თქვენი აზრით, ადამიანებს, რომლებიც ახლა ქუჩაში დგანან, და მათაც, ვინც ჯერ ისევ სახლში რჩება, რა სურთ: სააკაშვილის წასვლა თუ სისტემური ცვლილება?
- არიან ისეთები, რომლებიც ფიქრობენ, ოღონდ სააკაშვილი წავიდეს და გვეშველებაო. მაგრამ ეს საზოგადოების მცირე ნაწილია. უმრავლესობას მართლა ყელში ამოუვიდა უსამართლობა და წაგებული ომი, რომელზეც გეუბნებიან: "მოვიგეთ".