კახა კუკავა: "ჩვენმა სტრატეგიამ გაამართლა. წარმატებულ სტრატეგიას კი არ ცვლიან"

"რეზონანსი"

2 მაისი, 2009

"თქვენ ახლა რა კითხვებსაც სვამთ, მე კი არ მაღიზიანებს; მე ყველაფერზე გიპასუხებთ; უბრალოდ, ჩემი აზრი თუ გაინტერესებთ, იმყოფებით პრეზიდენტის პროპაგანდისტული მანქანის დიდი ზეგავლენის ქვეშ," - "რეზონანსის" შეკითხვებს "კონსერვატორი" კახა კუკავა პასუხობს.

- უკვე მერამდენე დღეა, საპროტესტო აქციები მიმდინარეობს და ჯერჯერობით, მიხეილ სააკაშვილის რეაქციიდან გამომდინარე, არაფერი ჩანს იმის მანიშნებელი, რომ ის გადადგება. თქვენ და თქვენი კოლეგები რის საფუძველზე აცხადებთ, რომ ის აუცილებლად გადადგება?
- თქვენი გამკვირვებია. სხვა რა გინდათ იმაზე მნიშვნელოვანი, რომ არც ერთი პოლიტიკური ორგანო აღარ საქმიანობს! ეს, რა თქმა უნდა, არ არის დასრულებული საქმე, მაგრამ ფაქტია, რომ ხელისუფლება პარალიზებულია. და ეს აუცილებლად მიგვიყვანს მიზნამდე.
- ხელისუფლება დიალოგზე რომ საუბრობს, თქვენ, ოპოზიციის რადიკალური ფრთის წარმომადგენლები მუდმივად უარს ამბობთ ამ შეთავაზებაზე. თქვენ ამბობთ, რომ საუბარია მხოლოდ გადადგომაზე...
- როგორც ჩანს, თქვენ დრო არ გრჩებათ, მიტინგებზე ხართ ხშირად და... უბრალოდ, ახალ ამბებს რომ გაეცნოთ... არც ტერმინი "რადიკალური ოპოზიცია" არის სწორი. ეს არის კლიშე, დამკვიდრებული გივი თარგამაძის მიერ. დამოუკიდებელი მედია, წესით, ამას არ უნდა იმეორებდეს.
რაც შეეხება თქვენს შენიშვნას იმის თაობაზე, რომ ჩვენ დიალოგის წინააღმდეგი ვართ: ორი კვირის წინ გაკეთდა ოპოზიციის ერთობლივი, ოფიციალური განცხადება. მასში ძალიან ნათლად არის ნათქვამი, რომ ოპოზიცია თანახმაა, შეხვდეს მიხეილ სააკაშვილს. და უარს ამაზე სააკაშვილი აცხადებს.
- უკაცრავად, შეკითხვა არ დამისრულებია: თქვენი ფრთა - ბურჯანაძე- "კონსერვატორების" - ამბობს, რომ ამ დიალოგში საუბარი იქნება მხოლოდ სააკაშვილის გადადგომაზე. როგორ ფიქრობთ, შესაძლებელია თუ არა, თქვენი ამ პოზიციის შენარჩუნებით ხელისუფლებამ ერთგვარად კუთხეში მიგიმწყვდიოთ, თქვენ კი ამით, საბოლოოდ, საზოგადოების ნდობა დაკარგოთ?
- პირველ რიგში: "ბურჯანაძე-კონსერვატორებიც" არის კლიშე. იმ განცხადებას, რომელზეც ზემოთ ვისაუბრე, ხელს აწერს აქციების ორგანიზატორი ყველა პარტია. ეს ხელოვნური დაყოფები... ზოგიერთი ამას აკეთებს განზრახ და მიზანმიმართულად, ზოგიერთი - არაინფორმირებულობის გამო.
არც ის არის მართალი, რომ ჩვენ მიხეილ სააკაშვილს მხოლოდ მის გადადგომაზე ვესაუბრებით. ის განცხადება ძალიან ბევრ კითხვაზე სცემს პასუხს. იქ პირდაპირ წერია, რომ ჩვენ, ამავდროულად, მზად ვართ, განვიხილოთ ხელისუფლების მიერ შემოთავაზებული ნებისმიერი სხვა საკითხი. ახლა, მას რა შეთავაზება ექნება, ან რა მოთხოვნა ექნება; იქნება ეს დაკავშირებული პოლიტიკურ კომპრომისთან თუ მის პირად უსაფრთხოებასთან, ეს მან უნდა გადაწყვიტოს. მე, მისი გადადგომის გარდა, სხვა რეალურ გამოსავალს ვერ ვხედავ. და არც იმაში დაგეთანხმებით, რომ ეს ჩიხი არის ოპოზიციისთვის. პირიქით. მე შეიძლება სხვაზე მეტი გამოცდილება მქონდეს ამ საკითხთან დაკავშირებით: სააკაშვილის გადადგომა არის ერთადერთი რეალური მოთხოვნა.
- შესაძლოა, ასე ჩანდეს თქვენი - ოპოზიციის თვალსაწიერიდან და არა მიხეილ სააკაშვილის თვალსაწიერიდან.
- გარწმუნებთ, რომ სააკაშვილის თვალსაწიერიდანაც ეს არის ერთადერთი რეალური საკითხი.
- რატომ ხართ ასე დარწმუნებული?
- ბოლო ორი წლის პოლიტიკური პროცესებიდან უამრავ მაგალითს მოგიყვანთ; ძალიან ბევრი არგუმენტი მაქვს იმის დასამტკიცებლად, რომ სააკაშვილი სხვა პოლიტიკურ საკითხს არ განიხილავს. გაიხსენეთ, რაზე იყო ხოლმე ადრე საუბარი: არჩევნები, პარლამენტი, მედია, პოლიტიკური პატიმრები, შინაგან საქმეთა სამინისტრო... არ განიხილავს! სანამ ეს პრეზიდენტია, არც ერთ საკითხს არ განიხილავს! მას შეუძლია ერთადერთი საკითხის განხილვა: ის დარჩება პრეზიდენტად თუ არ დარჩება. ამიტომ: იმ ექსპერტებს, რომლებსაც მიაჩნიათ, რომ დიალოგის რესურსი ამოწურული არ არის და ჰგონიათ, რომ სააკაშვილის პირობებში რაღაც რეფორმების გატარება შესაძლებელია, ალბათ დაღვინება, დაბრძენება სჭირდება. ჯერჯერობით, გამოუცდელები არიან. დაღვინდებიან და მერე თვითონაც დარწმუნდებიან.
- სხვათა შორის, ასეთ მოსაზრებას არამხოლოდ ექსპერტები გამოთქვამენ; ამაზე საუბრობენ საზოგადოების ცნობილი წარმომადგენლებიც. და, თუ დავაკვირდებით, ყველა მათგანი ხელისუფლების მხარდამჭერი არ არის.
- არ არის გასაკვირი, რომ მათ პოლიტიკური გამოცდილება აკლიათ. ის, რაც შეიძლება თეორიულად იყოს ლოგიკური (და თეორიულად მართლაც ლოგიკურია რაღაც შეთანხმების ძიება, როცა ქვეყანაში ასეთი დაპირისპირებაა), ამ კონკრეტულ შემთხვევაში გამორიცხულია - მიხეილ სააკაშვილის პოზიციის გამო.
- ხელისუფლების მხრიდან ტერორი სხვადასხვა ფორმით სულ უფრო ძლიერდება. ამან, თქვენი აზრით, სანამდე შეიძლება მიიყვანოს პროცესი?
- ალბათ, ეს უფრო ჩვენს საპასუხო მოქმედებებზე არის გათვლილი - იმისათვის, რომ ამ პოლიტიკურ პროცესს ხასიათი შეუცვალოს. თქვენ ამბობთ, და შეიძლება გარედან მართლაც ასე ჩანს, რომ ერთ ადგილას ვდგავართ და არაფერი ხდება, მაგრამ სინამდვილეში, ძალიან ეფექტური გამოდგა ეს პროცესი. ჩვენ გავიარეთ კრიტიკული პერიოდი - პირველი ათი დღე, როდესაც, ერთი მხრივ, იყო დიდი მოლოდინები და, მეორე მხრივ, იყო მკაცრი ამინდები. ახლა ამინდებიც დათბა; და, რაც მთავარია, ხალხი უკვე ფსიქოლოგიურად შეეჩვია ამ სტრატეგიას, მასთან ადაპტირებულია. და არავინ ელოდება, რომ კონკრეტულად დღეს მოხდება რამე. ყველა ვაცნობიერებთ, რომ ეს არის გრძელვადიანი სტრატეგია, რომელიც გამოიტანს კონკრეტულ შედეგებს რაღაც კონკრეტული პერიოდის შემდეგ. გამახსენეთ, აბა, ბოლო სამი კვირის განმავლობაში სააკაშვილის რაიმე ოფიციალური ღონისძიება ან შეხვედრა! რამდენიმე დღის წინ წერილი გავაგზავნეთ დათო ბაქრაძესთან და გუშინ უკან მოგვიბრუნა ფოსტამ: პარლამენტი აღარ მუშაობს. მთავრობაზე არ არის საუბარი: პრემიერ-მინისტრი საერთოდ თუ გინახავთ - მისი ფოტო ბოლო ერთი თვის მანძილზე?! ამიტომ: ეს იმდენად ეფექტური სტრატეგიაა, რომ... ტერორი მიზნად ისახავს ზუსტად იმას, რომ ეს სტრატეგია შეგვაწყვეტინონ და გადავერთოთ სხვა ტიპის დაპირისპირებაში, სადაც უკვე ხელისუფლების მხარეს იქნება ბურთი. მან იცის, რომ დარბევა მისი ხელისუფლების უკანასკნელი დღე იქნება. მეორე მხრივ, მათ არ აქვთ დარჩენილი რაიმე პოლიტიკური რესურსი, რომ ეს კრიზისი პოლიტიკური გზით მოაწესრიგონ. ასე რომ, ჩიხში დღეს ნამდვილად ხელისუფლებაა და არა ოპოზიცია. მას სვლა არ აქვს. ოპოზიციას კი აქვს თავისი სვლა და ჩვენ ამ სვლებს ვაკეთებთ.
- ლევან გაჩეჩილაძე ოპოზიციის ერთ-ერთ ლიდერია. მან მიტინგზე მოსულ ადამიანებს განუცხადა: თუ ეს ხელისუფლება "ბიჭობას" გამოიჩენდა, ამას ჩვენი მხრიდანაც მოჰყვებოდა "ბიჭობაო". ასეთი ფრაზეოლოგია რას უნდა ნიშნავდეს, თქვენი აზრით?
- ეს, ბუნებრივია, ნიშნავს იმას, რომ ოპოზიცია მზად არის ნებისმიერი ტიპის თავდასხმისათვის. ჩვენ არ ავყვებით პროვოკაციას.
- თქვენ პოლიტიკური თანამებრძოლის მიერ გაკეთებული განცხადების გამართლება გიწევთ.
- მე რომ დაცვა მიწევდეს, მაშინ თქვენ არგუმენტი დაგჭირდებათ: რაც ლევან გაჩეჩილაძემ განაცხადა, როდის იქნა ეს განხორციელებული, როგორ ინტერპრეტაციასაც თქვენ აკეთებთ.
- შეიძლება იმიტომაც, რომ ეს ხალხს არ უნდა.
- დისკუსიაშიც კი არ შემოვდივარ. ძალიან უსუსური არგუმენტია, რომ ლევან გაჩეჩილაძეს ხალხი არ აჰყვა!
- "უცნობი" რომ ამბობს საკანში, თუ სისხლი უნდათ, მიიღებენ სისხლსო, ეს, როგორ უნდა გავიგოთ, თქვენი აზრით?
- იცით, ახლა, "უცნობი" ნამდვილად არ არის პოლიტიკური გუნდის წევრი...
- უარყოფთ, რომ სწორედ მან ერთგვარი პოლიტიკური ამინდი შექმნა?
- მერე რა! პოლიტიკურ ამინდს ქმნის საზოგადოებაც, მათ შორის - "უცნობიც". მაგრამ "უცნობის" პრეს-სპიკერი მე ვარ. ეს კულტურა უნდა დამკვიდრდეს საქართველოში: ის ადამიანი თავისუფალი მოსაზრების მქონეა.
- თქვენი პოზიცია მაინტერესებს: მის მოსაზრებას დაეთანხმეთ?
- ახლა, თქვენ აკეთებთ, იცით, როგორ ინტერპრეტაციებს? მურმან ლებანიძის ლექსია: "უფლისციხესთან სისხლისფერი ყაყაჩოს წვეთი არა დაღვრილის, დასაღვრელის ალბათ მაცნეა". ასეთი ინტერპრეტაციით შეგეძლოთ გეთქვათ, რომ ლებანიძე სისხლისღვრისკენ მოუწოდებდა ქართულ საზოგადოებას. არ შეიძლება კრეატიულ კონტექსტში ნათქვამი ფრაზების პირდაპირი მნიშვნელობით ინტერპრეტირება. "უცნობი" რას გულისხმობდა, ამაზე შეგიძლიათ მისგანვე აიღოთ ინტერვიუ.
- თქვენი შთაბეჭდილება მითხარით, თუ შეიძლება.
- მე ეს ადეკვატურად აღვიქვი. მგონი, ეს ადეკვატურია: თუ სააკაშვილს უნდა სისხლი, ის დაამთავრებს ისე, როგორც ჩაუშესკუმ დაასრულა. სწორედ ამიტომ მოვუწოდებთ სააკაშვილს, ამ გზით არ წავიდეს.
- ე.ი., თქვენ არ გამორიცხავთ მოვლენების ასე განვითარებას.
- არ გამოვრიცხავ. ჩემი აზრი თუ გაინტერესებთ, მე გამოვრიცხავ დიალოგს. წინააღმდეგი კი არ ვარ, უბრალოდ, სააკაშვილი არის შეურაცხადი. ეს არ არის მარტო ჩემი ვარაუდი. ეს არის მისი გარემოცვიდან, მისი პირადი დაცვიდან მიღებული ინფორმაცია. გამორიცხულია, რომ ის დიალოგზე დათანხმდეს. ტრანკვილიზატორებზე არის ადამიანი! რის დიალოგზე წამომსვლელია?
- დარწმუნებული ხართ, რომ საპროტესტო მოძრაობას შეინარჩუნებთ? როგორ ფიქრობთ, ხალხი არ დაიღლება?
- სიცივეში თუ არ დაიღალა, სითბოში რა დაღლის?
- 9 აპრილამდე ოპოზიცია ამბობდით, რომ სააკაშვილის გადადგომისთვის პროტესტის დედაქალაქის მასშტაბიც სრულიად საკმარისი იქნებოდა. მოგვიანებით რეგიონების მობილიზება რატომ გადაწყვიტეთ?
- ეს არასდროს გვითქვამს. პირიქით, ყოველთვის ხაზს ვუსვამდით იმას, რომ რეგიონების მონაწილეობა არის ძალიან მნიშვნელოვანი. თქვენ ახლა რა კითხვებსაც სვამთ, მე კი არ მაღიზიანებს; მე ყველაფერზე გიპასუხებთ; უბრალოდ, ჩემი აზრი თუ გაინტერესებთ, იმყოფებით პრეზიდენტის პროპაგანდისტული მანქანის დიდი ზეგავლენის ქვეშ - იმიტომ, რომ ეგ არის კლიშეები, რომლებიც 90-იანი წლების დასაწყისიდან მუშაობდა. ზვიად გამსახურდიას დროს იყო კლიშე, რომ მას ვერა-ვაკე ებრძოდა, სამეგრელო კი მხარს უჭერდა. ახლა ეს სააკაშვილის "დოქტრინის" ერთ-ერთი ნაწილია: პირდაპირ იმეორებს იგივე ფრაზებს: "მე ვერა-ვაკე მებრძვის", და აქედან გამომდინარე ცდილობს, მხარი რეგიონებმა დაუჭირონ. ამას თქვენ თუ გაიმეორებთ, მისი სახელით მაინც გაიმეორეთ! ჩვენ როდის გვითქვამს, რომ რეგიონები არის უმნიშვნელო? გადახედეთ, რა კონტინგენტია საკანში!
- როგორც ჩანს, მე მომეჩვენა. ოპოზიციის ლიდერებისგან არ გსმენიათ, თბილისის პროტესტი საკმარისიაო?
- დიახ, მოგეჩვენათ. არც ერთი საპროტესტო კამპანია არ განხორციელებულა რეგიონებში გასვლების გარეშე. რა, არ იყო ასეთი შეხვედრები ქუთაისში, ბათუმში, თელავში, ზუგდიდში?
- კი, ბატონო, მაგრამ იქიდან ხალხის ჩამოყვანაზე არ იყო საუბარი.
- შეკითხვა უნდა დააზუსტოთ: ხალხის ჩამოყვანა და მონაწილეობა სხვადასხვა რამ არის. თუმცა ჩამოყვანაც იყო. და უშუალოდ საპროტესტო აქციებში მონაწილეობა სხვა თემა არის, რეგიონების მონაწილეობა კი არის სხვა თემა. ესეც არის კლიშე. რეგიონების მონაწილეობა პოლიტიკურ პროცესში არ არის ის, რომ რეგიონი მექანიკურად მანქანაში ჩასვა და თბილისში წამოიყვანო; პირიქით, თუ მატერიალური რესურსები გვეყოფა, ეს აქციები უნდა გაიშალოს რეგიონებში. ეს არის რეგიონების მონაწილეობა, თორემ ის სიმბოლური მონაწილეობაა, რაც ახლა ხდება.
- პარტიარქის ფაქტორი ისევ ჩაერთო მიმდინარე პოლიტიკურ პროცესებში. თქვენი აზრით, შესაძლებელი იყო თუ არა ამ ფაქტორის აცილება?
- ესეც მითოლოგიაა. ვიცი მისი პოზიცია: პოლიტიკის საკითხებში უწმინდესი არასდროს ერევა ასე პირდაპირ - აი, ახლა უნდა გადადგეს თუ არ უნდა გადადგეს. ის ერევა დაახლოებით იმ კონტექსტში, როგორც ამას აკეთებს საერთაშორსო საზოგადოება - რათა პროცესები ჩარჩოდან არ გავიდეს. ძალზე მნიშვნელოვანი იყო მისი ჩარევა, როცა ჯარისკაცებსა და პოლიციელებს მოუწოდა, იარაღი არ აიღოთო. იმიტომაც არის, რომ ახლა სააკაშვილი ბოდრუმში დატანტალებს და ჯარი და პოლიცია აღარ ემორჩილება. პატრიარქი ერევა მშვიდობისა და სტაბილურობის შენარჩუნების ღონისძიებებში. შეიძლება ასეთი ჩარევაც პოლიტიკური პროცესის ნაწილად განვიხილოთ.
- პატრიარქის თუნდაც ირიბი ჩარევის შედეგად ვინ შეიძლება დათმოს: ოპოზიციამ თუ ხელისუფლებამ?
- ხელისუფლებამ.
- რატომ ხართ ასე დარწმუნებული?
- პატრიარქი უზნეობისა და ძალადობის წინააღმდეგია. ის ამის პრევენციას აკეთებს. უზნეობა და ძალადობა კი ხელისუფლების რესურსია და არა ჩვენი. პატრიარქმა რომ თქვა, ძალას ნუ გამოიყენებთო, ამან ჩვენ გაგვაძლიერა, ხელისუფლება კი დაასუსტა.
...როდესაც სააკაშვილი მიტევებაზე საუბრობდა და ალასანიას ხელს ართმევდა, მერაბიშვილის ზონდერბრიგადებმა იმავე დღეს ოთხი ადამიანი დაასახიჩრეს. ეს არის ფარსი! სააკაშვილი საუბრობს მიტევებაზე და პარალელურად, ადამიანის დასახიჩრების განკარგულებებს იძლევა!
- თქვენ მიტინგზე განაცხადეთ, რომ შემოწირულობებზე გახდით დამოკიდებული. აღარავინ გაფინანსებთ?
- არც არავინ გვაფინანსებდა. არის პარტიული შენატანები.
თქვენ ჩემზე უკეთესად გეცოდინებათ, მედიის თეორიაა: როგორ ხდება ამ კლიშეების ჩამოყალიბება, მერე შენდა უნებურად იმეორებ... "აღარავინ გაფინანსებთ" - ესეც არის კლიშე. ოლიგარქები, ოლიგარქებიო! და მანახონ ერთი ოლიგარქი, კაცო! ავლაბარში ლაშა ჩხარტიშვილმა ოცი ლარი რომ მისცა ვიღაცას, კვების ფული, ეგ გადაიღო კამერამ და რუსეთის სპეცსამსახურებიდან თუ ვიღებთ მილიონებს, ამის არანაირი მტკიცებულება არ არსებობს?
- მე რუს ოლიგარქებზე არ გეკითხებით. მაინტერესებს, გაქვთ თუ არა დაფინანსება კერძო პირების მხრიდან.
- დიახ, არის. მაგალითად, გუშინ პენსიონერმა თავისი პენსია მთლიანად გადმოგვცა - 100 ლარი.
- შეგიძლიათ მითხრათ, გაქვთ თუ არა მსხვილი ფინანსური მხარდაჭერა?
- არ გვაქვს.
- მიტინგის მონაწილეებისგან მომისმენია, "კონერვატორებმა" მედროშეებს 50-50 ლარი დაურიგესო. იმ მიტინგებზე ხომ ყველა სააკაშვილის მოგზავნილი არ დგას? თქვენი აზრით, რატომ ვრცელდება ამ ტიპის ხმები თქვენივე სივრცეში?
- ის, რასაც თქვენ ამბობთ, ტყუილია. ფული რომ გვქონდეს, დროშები მართლა უკეთესად იფრიალებდა.
- ჯობს, ფული გადაუხადოთ და ასე საპროტესტო მუხტი უფრო ძლიერი იქნება?
- არის საკითხები, სადაც ჯობს ფულით მუშაობა და არის საკითხები, სადაც ჯობს მუშაობა უფულოდ. ადამიანების მობილიზაციაში ჩვენ ფული არ გვჭირდება, მაგრამ რომ იყოს მატერიალური რესურსები, მაგალითად, ელემენტარული პირობების შესაქმნელად (ღამის კვება)... და საერთოდ, სერიოზული ჟურნალისტი არ უნდა სვამდეს ასეთ შეკითხვას. 50 ლარად დამლაგებლებს ქირაობენ მთელი თვე და ჟურნალისტებიც ვიცი, რომლებიც 50 ლარად მუშაობენ! როგორ წარმოგიდგენიათ, 50 ლარს დროშის ქნევაში უხდიან? სამი ლარი მაინც გეთქვათ, კაცო!
არსებობს უზარმაზარი საინფორმაციო ნაკადი, რომელსაც ავრცელებს პროპაგანდისტული მანქანა. 99%, რასაც გადასცემს "რუსთავი-2", "იმედი" და "I არხი"... ხომ უყურებთ ამ არხებს, არა? და ქვეცნობიერად მაინც უჯერებთ. რადიკალური ოპოზიციაო, ტერმინი რომ ახსენეთ, ეგ პროპაგანდისტული მანქანის მიერ დამკვიდრებული ტერმინია! არანაირი ფრთა არ არსებობს!
- წინა ინტერვიუში მითხარით, შეიძლება ვართ რადიკალურები იმათგან განსხვავებით, ვისაც თქვენ კონსტრუქციულებს უწოდებთო.
- პროპაგანდისტული მანქანა ასეთ ტერმინს (რადიკალური ოპოზიცია) რომ ამკვიდრებს, ამას ვერ ხედავთ? მე შეიძლება გითხარით, ეს არაფერს ნიშნავს - ერთ ინტერვიუში მიცემული ერთი ფრაზა.
ეს ჟურნალისტებისა და არაინფორმირებული ხალხის ილუზიები და ალუზიებია. ექვს-ექვსი საათი შტაბის სხდომებს ვესწრები, კონსულტაციები გვაქვს და მე არაფერი ვიცი იმის თაობაზე, რომ ჩვენ - აქციების ორგანიზატორებს განსხვავებული პოზიციები გვქონდეს. თუ რამე იცით, მითხარით. თქვენი ინტერვიუს (და არა მხოლოდ თქვენი) 80% გივი თარგამაძის კაბინეტში დაწერილ ჭორებზეა აგებული. აი, ეს არის! გაავრცელებენ რაღაც ჭორს, გადასცემს ამას "რუსთავი-2" და... მედია თუ არ გაიხსნა, საზოგადოება მუდმივად იქნება ამ ისტერიასა და ფსიქოზში!
- შეგიძლიათ მითხრათ, უახლოესი მომავლის კონკრეტული გეგმები როგორია?
- ივნისში ვაპირებთ ვადამდელი საპრეზიდენტო არჩევნების ჩატარებას; შემოდგომაზე - ახალი კონსტიუტციის მიღებას.
- მაისი გამოგრჩათ. მაისის გეგმები როგორია?
- არ ვაპირებთ სტრატეგიაში რაიმე სიახლის შეტანას. ჩვენმა სტრატეგიამ გაამართლა, წარმატებულ სტრატეგიას კი არ ცვლიან. შეიძლება დაემატოს ტაქტიკური ნაბიჯები: ახალი ობიექტის, ახალი პიკეტის დამატება, რეგიონში გაშლა. სტრატეგია კი არ შეიცვლება.