ოპოზიციურმა გაერთიანებამ უკან დაიხია?

"რეზონანსი" - "მთელი კვირა"

21 იანვარი, 2008

დავით უსუფაშვილი: "ყოველ ახალ დღეს ახალი რეალობა მოაქვს"

"როდესაც 5 იანვრის არჩევნებს ვაპროტესტებთ და ვამბობთ, რომ მიხეილ სააკაშვილი არის არალეგიტიმური პრეზიდენტი, ეს არ ნიშნავს, რომ ჩვენ სახელმწიფოს და, ზოგადად, სახელისუფლებო სისტემას ვუცხადებთ პროტესტს და სადმე, ტყეში გავრბივართ თოფებით", - აცხადებს ოპოზიციური გაერთიანების ერთ-ერთი ლიდერი - დავით უსუფაშვილი.
რას ნიშნავს საპარლამენტო არჩევნებისთვის სერიოზული მზადების დასაწყისი: ოპოზიციის უკან დახევას? სხვა - მისთვის უფრო მნიშვნელოვანი ფრონტის გახსნას? ან კიდევ: რატომ აცხადებს გაერთიანების ერთი წარმომადგენელი, რომ დაიწყება საყოველთაო დაუმორჩილებლობა, გაერთიანების მეორე წარმომადგენელი კი ხაზგასმით ამბობს, რომ საყოველთაო დაუმორჩილებლობის საკითხი ეროვნულ საბჭოში არ განხილულა? ასევე, გაერთიანების ზოგიერთი წევრი ხმამაღლა აცხადებს, რომ მიხეილ სააკაშვილი "შულავერის პრეზიდენტია", ბ-ნი უსუფაშვილი კი, როგორც ჩანს, ერთგვარ უხერხულობას გრძნობს თანამებრძოლების ასეთი ფრაზეოლოგიის გამო. ეს, ერთი შეხედვით, უმნიშვნელო დეტალებია. ფაქტია, რომ ბოლო დროს საზოგადოების არცთუ უმნიშვნელო ნაწილს ოპოზიციური გაერთიანების მიმართ კითხვები გაუჩნდა.
"მთელ კვირას" რესპუბლიკური პარტიის თავმჯდომარე, საერთო სახალხო ფრონტის ერთ-ერთი ლიდერი - დავით უსუფაშვილი ესაუბრება.

- ცესკო-ს მიერ საპრეზიდენტო არჩევნების საბოლოო შედეგების გამოცხადების შემდეგ ოპოზიციური გაერთიანება - საერთო სახალხო ფრონტი და მოქმედი ხელისუფლება მოლაპარაკებების მაგიდას მიუსხდნენ. ვინ იყო დიალოგის ინიციატორი?
- არჩევნების შემდეგ ხელისუფლებასთან რაიმე განსაკუთრებული ურთიერთობა არ დაწყებულა. მთელი ამ მძიმე ოთხი თვის განმავლობაში პარლამენტის თავმჯდომარესთან და შემდეგ - პრეზიდენტის მოვალეობის შემსრულებელთან - ქ-ნ ნინო ბურჯანაძესთან იყო მუდმივი კონტაქტები ბევრ საკითხთან დაკავშირებით. თემები ეხებოდა იმ მომენტისთვის ყველაზე მნიშვნელოვან მოვლენებს: მაგალითად, 7 ნოემბერს, მოშიმშილეთა დარბევის დროს მომიწია მასთან დარეკვა და მაშინ იმ თემებზე ვსაუბრობდით; საარჩევნო კამპანიის პერიოდში იყო ძალიან ბევრი საკითხი, რომელზეც, ასევე, მასთან ვმსჯელობდით ხოლმე; და არჩევნების შემდეგ, ცხადია, თემები შეეხებოდა არჩევნების შედეგებს, იმ დავებს, რომლებიც მიმდინარეობდა სხვადასხვა სასამართლო ინსტანციაში. მსჯელობა იყო იმ საკითხზეც, რომ ძალიან ხშირად, საარჩევნო კომისიები იკეტებოდა მაშინ, როდესაც ჩვენ საჩივრები შეგვქონდა.
პარალელურად, პლებისციტის შედეგებიდან გამომდინარე - როდესაც ქართველმა ხალხმა მოითხოვა საპარლამენტო არჩევნების გაზაფხულზე ჩატარება - ეს თემა შემოვიდა დღის წესრიგში. მანამდე, საკუთრივ, პლებისციტის კითხვის ფორმულირება იყო პრობლემური. კონსულტაციები ამ თემაზე მიმდინარეობდა და გადაწყვეტილება უშუალოდ პლებისციტამდე სულ ორი კვირით ადრე იქნა მიღებული. პლებისციტის შედეგებიდან გამომდინარე კი, კონტაქტები გაგრძელდა: საპარლამენტო არჩევნების თარიღთან დაკავშირებით; საპარლამენტო არჩევნების ნორმალურად უზრუნველყოფისთვის საჭირო თემებთან დაკავშირებით. აქ იგულისხმება: ცესკო-ში პარიტეტი, სატელევიზიო სივრცის გახსნა და დაბალანსება - რაც საზოგადოებრივი არხის რეფორმით უნდა იქნას მიღწეული და ა.შ.
არის თემები, რომლებზეც ჩვენი პოზიციები ერთმანეთისგან დიამეტრალურად განსხვავდება. ასეთი საკითხია 5 იანვრის არჩევნების შედეგები. ამასთან დაკავშირებით ხელისუფლება თავის პოზიციაზე მყარად დგას. ეს პოზიცია კი, ჩვენი აზრით, არის არასწორი და დაუსაბუთებელი. ამიტომ ჩვენ, საპროტესტო აქციებთან ერთად, მეორე ტურის მიღწევის მცდელობასთან ერთად, რა თქმა უნდა, საპარლამენტო არჩევნებზე ვფიქრობთ.

- ე.ი., მეორე ტურის ჩატარების მოთხოვნა არ დასუსტებულა? ის ძალაში რჩება?
- მეორე ტურის მოთხოვნა ძალაში რჩება, მაგრამ ყოველ ახალ დღეს ახალი რეალობა მოაქვს. თუ სააკაშვილი პრეზიდენტობას დაიწყებს, მაშინ დღის წესრიგში მეორე ტური კი არ დადგება, არამედ იმ არჩევნების არშემდგარად, ჩაშლილად, გაყალბებულად გამოცხადება. ამან კი სამართლებრივად უნდა მიგვიყვანოს ახალ საპრეზიდენტო არჩევნებამდე და არა - მეორე ტურამდე.
- ის, რომ ოპოზიციური გაერთიანება ხელისუფლებასთან რაღაც დიალოგზე უკვე წახვედით...
- ძალიან გთხოვთ, ფორმულირება დავაზუსტოთ. მე ჩემს პასუხში სწორედ ამაზე ვსაუბრობდი: რომ საუბრები ქ-ნ ბურჯანაძესთან ყველა ეტაპზე იყო, არის დღესაც და იქნება ხვალაც.
- თუმცა, ისინი, ვინც 15 იანვარს გამართულ საპროტესტო აქციაში მონაწილეობდნენ, ბოლო დღეების განმავლობაში გაერთიანებული ოპოზიციის მიმართ უკმაყოფილებას ვერ მალავენ. მათ მიაჩნიათ, რომ გაერთიანებულმა ოპოზიციამ უკან დაიხია.
- არ ვიცი, ვის გულისხმობთ...
- მაგალითისთვის გამოდგება, თუნდაც, ძალიან ბევრი მოკლე ტექსტური შეტყობინება ტელეგადაცემებში, გამოხმაურებები მედიის საშუალებით. და, უბრალოდ, ამას ადამიანები, ძალიან ხშირად, კერძო საუბრებში აღნიშნავენ. ეს რაღაც ტენდენციაზე ხომ მიუთითებს?
- ეს მიუთითებს არასწორ ინფორმირებულობაზე, რომელშიც შესაძლოა, ჩვენი ბრალიც არის, მაგრამ შესაძლოა, არის მედიის ბრალიც. ჩვენ არასდროს, არც ერთ ეტაპზე, არავისთან გვქონია საუბარი არანაირ სამთავრობო თანამდებობაზე. ინციდენტს, რომელიც მოჰყვა ქ-ნ ბურჯანაძის განცხადებას ვიცე-პრემიერებთან დაკავშირებით, პასუხი გაეცა ბრიფინგის საშუალებით.
- მთავრობაში არანაირი პოსტის დაკავებას არ დათანხმდებით?
- გაერთიანებულ ოპოზიციაში ეს საკითხი, უბრალოდ, არავის მხრიდან არ იხილება.
- გაერთიანებული ოპოზიციის წარმომადგენლები აცხადებენ, რომ არალეგიტიმურ ხელისუფლებასთან არ ითანამშრომლებენ; რომ ეს მოლაპარაკებები კი არა, ოპოზიციის ულტიმატუმებია. თქვენ როგორ შეაფასებთ ხელისუფლებასთან ურთიერთობას?
- ხელისუფლებაში განვასხვავოთ სხვადასხვა შტო. ახლა საქართველოს პარლამენტთან, მისი ლეგიტიმურობის თვალსაზრისით, არანაირი პრობლემა არ მაქვს. ამიტომ, საქართველოს პარლამენტთან (რომლის წევრები ჩვენი პარტიის წევრები და ლიდერები არიან), ცხადია, მუშაობა გაგრძელდება საარჩევნო კოდექსზე, სხვა საპარლამენტო თემებზე. როდესაც 5 იანვრის არჩევნებს ვაპროტესტებთ და ვამბობთ, რომ მიხეილ სააკაშვილი არის ფალსიფიცირებული არჩევნების შედეგად არჩეული, არალეგიტიმური პრეზიდენტი, ეს არ ნიშნავს, რომ ჩვენ სახელმწიფოს და ზოგადად, სახელისუფლებო სისტემას ვუცხადებთ პროტესტს და სადმე, ტყეში გავრბივართ თოფებით. ეს არის ძალიან მნიშვნელოვანი ასპექტი იმისთვის, რომ სწორად გავიგოთ, რას ამბობენ პოლიტიკოსები.

- ლეიბორისტები, ირინა სარიშვილი - ის პოლიტიკური ძალები, რომლებიც თქვენს გაერთიანებაში არ არიან, ღიად აპროტესტებენ, რომ დიალოგი - თუნდაც, პარლამენტის თავმჯდომარესთან, მათთვის აბსოლუტურად მიუღებელია. შესაძლებელია, ამან თქვენს ურთიერთობაზე ერთგვარი ასახვა ჰპოვოს?
- ლეიბორისტებთან ჩვენ გვქონდა და გვაქვს ცივილური ურთიერთობა. მაშინაც, როცა ისინი ეროვნული საბჭოს შემადგენლობაში იყვნენ და მას შემდეგაც, რაც მათ ცალკე გასვლა გადაწყვიტეს. ეს ურთიერთობები ერთმანეთის პოზიციების ურთიერთპატივისცემას ემყარება. პირადად მე მიმაჩნია, რომ ლეიბორისტების ცალკე გასვლა უმძიმესი შეცდომა, არასწორი ნაბიჯი იყო, მაგრამ ამაზე მათგან ახსნა-განმარტებას არ ვითხოვ. მე მხოლოდ ჩემს პოზიციას გამოვთქვამ. ყველას აქვს უფლება, გამოთქვას თავისი აზრი. მაგრამ ყველას ვთხოვდი, აზრები და პოზიციები მხოლოდ რეალურ ფაქტებზე და არა ჭორებზე დაყრდნობით გამოთქვან.
- საზოგადოებრივი მაუწყებლის ახალ სამეურვეო საბჭოში გაერთიანებული ოპოზიცია ვის წარდგენას აპირებს?
- პოზიცია საბოლოოდ ჩამოყალიბებული არ არის. უახლოეს დღეებში უნდა ველოდოთ საბოლოო გადაწყვეტილებას კანდიდატების თაობაზე.
- მოლაპარაკებების შედეგად მხოლოდ საზოგადოებრივი მაუწყებლის ახალი სამეურვეო საბჭოს შექმნის თაობაზე მიღებული გადაწყვეტილება არსებობს? არის თუ არა მიღებული რაიმე სხვა, კონკრეტული გადაწყვეტილება?
- სხვა კონკრეტული პასუხი ჩვენ მიერ დასმულ სხვა კონკრეტულ საკითხებზე არ არსებობს.
- არც - საარჩევნო საკითხებზე? არც - უზენაეს სასამართლოსთან დაკავშირებით?
- უზენაესი სასამართლოს თემა ჯერ არც ყოფილა მსჯელობის საგანი.
- რა ეტაპზეა მსჯელობა საარჩევნო ადმინისტრაციების დაკომპლექტებასთან დაკავშირებით?
- ჩვენი პოზიცია დავაფიქსირეთ, მათ შორის - წერილობითაც. ბურჯანაძის მხრიდან, პრინციპში, გამოთქმულია მზაობა ამ საკითხებზე, მაგრამ მას ეს ჯერ არ გაუხმოვანებია.
- სახალხო დამცველის - სოზარ სუბარის მიერ მიხეილ სააკაშვილის მიმართ გაკეთებულ ღია წერილს მოჰყვა სააკაშვილის სტუმრობა ობმუდსმენის ოფისში. სუბარი შეხვედრით კმაყოფილია. საზოგადოების წარმომადგენლები კი, თავის მხრივ, უკმაყოფილებას გამოთქვამენ იმის გამო, რომ ომბუდსმენმა პრეზიდენტს მეორე ვადით არჩევა მიულოცა. თქვენ რა რეაქცია გქონდათ წერილის ამ ნაწილზე?
- მილოცვა, მისამძიმრება და მსგავსი თემები ძალიან პერსონალური საკითხებია, ამიტომ ამაზე ვერანაირ კომენტარს ვერ გავაკეთებ. მე უფრო დიდი ინტერესით გავეცანი წერილს, რომელიც ძალიან საყურადღებოა.
- თუმცა, წერილის შესავალში სუბარი აქცენტს მიხეილ სააკაშვილის სტატუსზე აკეთებს.
- კიდევ ვიმეორებ: პირადად სუბარის გადასაწყვეტია, ვის რას მიულოცავს და ვის რას მიუსამძიმრებს. ამ წერილში სახალხო დამცველი ძალიან სერიოზულად და კომპეტენტურად მსჯელობს და, სწორედ, ეს არის საზოგადოებრივად მნიშვნელოვანი.

- ოპოზიციურმა გაერთიანებამ სცადა, საერთაშორისო ყურადღება მიეპყრო იმ მტკიცებულებების საფუძველზე, რომლებიც მას ხელთ აქვს. რა შედეგს მიაღწიეთ? დასავლეთის მხრიდან კონკრეტული მხარდაჭერის მოპოვება შეძელით?
- შედეგი ძალზე სერიოზულია: საერთაშორისო საზოგადოება, რომელიც მიხეილ სააკაშვილს და მის გუნდს ქვეყანაში დემოკრატიის მშენებლად და რეგიონში - დემოკრატიის შუქურად მიიჩნევდა, ბოლოს და ბოლოს, გამოერკვა. ეს არის უდიდესი მიღწევა ქართველი ხალხის, ოპოზიციის - ყველასი, ვისაც საქართველოს მომავალი აწუხებს; ვინც დაინტერესებულია, რომ საერთაშორისო საზოგადოება ხედავდეს, ერთი მხრივ, თავისუფლებისმოყვარე, ევროპული ღირებულებების ერთგულ ხალხს, მეორე მხრივ კი იმას, თუ როგორი ხელისუფლება ჰყავს ამ ხალხს და საით მიჰყავს მას ეს ქვეყანა. სამწუხაროდ, ამ პროცესს რამდენიმე წელი დასჭირდა; 7 ნოემბერი დასჭირდა, მაგრამ, ბოლოს და ბოლოს, ყველა გამოერკვა.
- ყველა - ვინ?
- უცხოეთში - ყველა. აბსოლუტურად ყველა - მიუხედავად იმისა, ვინ რა შეფასება გამოთქვა ჩატარებულ არჩევნებთან დაკავშირებით.
- რა ეტაპზეა თქვენი ბრძოლა სასამართლო ინსტანციებში?
- მოსამართლეებმა ყველაფერი იღონეს, რათა განხილვები ისე ჩაეტარებინათ, რომ ამაზე საზოგადოების მხრიდან სათანადო რეაგირება ვერ მომხდარიყო. პროცესები, ფაქტობრივად, ქურდულად გაიმართა. ზოგი პროცესი გაიმართა სარჩელის შეტანიდან ოცი წუთის შემდეგ, ზოგი - შუაღამისას, დილის ხუთ საათზე. ამ სასამართლოებისგან ჩვენ მეტს არც ველით.
- თუკი ახლა სასამართლო ინსტანციებში თქვენს მიზანს ვერ მიაღწევთ, მაშინ რას აპირებთ?
- თვითმკვლელობას არ ვაპირებთ. ბოლომდე ვიბრძოლებთ. აუცილებლად შევა სარჩელი სტრასბურგში. საპარლამენტო არჩევნების შედეგად კი საქართველოში აუცილებლად შეიცვლება ხელისუფლება. ეს გამოიწვევს ძალიან ბევრ ცვლილებას სასამართლოებშიც. პოლიციური, რეპრესიული სისტემა, რომელსაც სააკაშვილი დაეყრდნო, დღევანდელი მდგომარეობით, დანგრეულია. უახლოეს კვირებში და თვეებში ვნახავთ, თუ რას ნიშნავს ეს.
- რისი თქმა გინდათ?
- სააკაშვილს დღეს აქვს ორი გზა: მან ეს სისტემა ან თავად უნდა დაშალოს, ან ეს სისტემა აფეთქდება. ეს გარდაუვალია. საპარლამენტო არჩევნებისთვის თავისუფალი მედიის, დაბალანსებული ცესკო-სა და სხვა საკითხების დაბევება სწორედ ამიტომ არის მნიშვნელოვანი - რომ დასრულდეს ამ სისტემის დემონტაჟი.
- სისტემის აფეთქებაში რა იგულისხმეთ?
- გამოცდილება უჩვენებს, რომ მოსმენებზე, ადამიანების დაშინებაზე აწყობილი სახელმწიფო მანქანა მარცხისთვის არის განწირული.
- საყოველთაო დაუმორჩილებლობა რას ნიშნავს?
- ეს ტერმინი - საყოველთაო დაუმორჩილებლობა - მე არ მითქვამს.
- ამაზე აქცენტს თქვენი გაერთიანების წარმომადგენლები აკეთებენ.
- ეროვნულ საბჭოს ამ თემაზე არანაირი გადაწყვეტილება არ მიუღია. რაც შეეხება ფრაზეოლოგიას, ამაზე ალბათ ის ხალხი გიპასუხებთ, ვინც ამაზე საუბრობს.
- ყოველ შემთხვევაში, ზვიად ძიძიგური გაერთიანების წარმომადგენელია.
- სრული პასუხისმგებლობით ვიმეორებ: ეროვნულ საბჭოს არანაირ დაუმორჩილებლობაზე არანაირი გადაწყვეტილება არ მიუღია.

- თინათინ ხიდაშელმა ერთ-ერთ თავის გამოსვლაში თქვა, რომ საპრეზიდენტო არჩევნებთან დაკავშირებული სასამართლო დავის საგნად იქცევა მხოლოდ ოქმები და ბიულეტენები. მან აღნიშნა: "ჩვენ არ ვისაუბრებთ სხვა უხეში დარღვევების შესახებ (იგულისხმება ადამიანების ცემა, დაშინება და ა.შ.). ოქმები და ბიულეტენებიც სავსებით საკმარისია გამარჯვების მისაღწევად". თქვენი აზრით, სხვა დარღვევები მეორეხარისხოვანია? იმ მტკიცებულებების გამოყენება საჭიროდ არ მიგაჩნიათ?
- ყველა ფაქტს აქვს თავისი რეაგირების მექანიზმი. მაგალითად, როდესაც იყო საუბარი სააკაშვილის მხრიდან ამომრჩევლის მოსყიდვაზე, მაშინ ამ თემაზე სასამართლო პროცესი შედგა და, ცხადია, მას საფუძვლად მოსყიდვის ფაქტი დაედო. ხოლო, როცა საუბარია 5 იანვარს არჩევნების შედეგების გაყალბებაზე ბიულეტენების ჩაყრით ან ამომრჩეველთა რაოდენობის ხელოვნურად გაზრდით, ცხადია, აქ ამ ფაქტებზე დაყრდნობით უნდა ვისაუბროთ. თუ ერთმა ადამიანმა სამი სხვადასხვა დანაშაული ჩაიდინა, თითოეულ მათგანს თავისი ფაქტები და მსვლელობისთვის შესაბამისი მექანიზმები აქვს.
- "შულავერის პრეზიდენტი" - როცა ოპოზიციური გაერთიანების ლიდერები ასეთი ფრაზეოლოგიით საუბრობენ, ხომ არ ფიქრობთ, რომ ეს არ ნიშნავს მხოლოდ იმას, რომ თქვენ და თქვენი ამომრჩევლები გაყალბებულ არჩევნებს არ აღიარებთ? განსაზღვრების კონტექსტი, გარკვეულწილად, თქვენ წინააღმდეგ მუშაობს.
- მე ეს ტერმინი არასდროს გამომიყენებია. სხვამ რა თქვა, არ ვიცი. ფაქტია, რომ მიხეილ სააკაშვილმა გამარჯვება და პროცენტები გაიფორმა იმავე მეთოდით, რა მეთოდითაც ედუარდ შევარდნაძე ("მოქალაქეთა კავშირი") თავის დროზე მოიპოვებდა გამარჯვებებს ცალკეულ რეგიონებში, აბსოლუტურთან მიახლოებული ციფრების ჩვენებით. იმავე მეთოდების გამოყენება დასჭირდა სააკაშვილს ამ პროცენტებამდე მისასვლელად. ამას, თავის დროზე, აკეთებდა ასლან აბაშიძეც - აჭარაში.

- ფრაზეოლოგიას დავუბრუნდეთ. ვთქვათ, ტერმინი, რომელიც ზემოთ აღვნიშნე, გამოიყენა სალომე ზურაბიშვილმა, ან - კობა დავითაშვილმა. როგორ ფიქრობთ, ეს პიროვნულად მათ წინააღმდეგ მუშაობს, თუ მათი სახელები უკვე ოპოზიციურ გაერთიანებასთან, შესაბამისად - მის პოზიციასთან ასოცირდება?
- ვერ გეტყვით. შესაძლოა, ეს თქვენი განსასჯელია - როგორ ფიქრობთ ამას. მე გეუბნებით, თუ რა პოზიცია მაქვს ამ საკითხთან დაკავშირებით და, თუ გნებავთ, კიდევ გავიმეორებ: სააკაშვილმა გამარჯვება მოიპოვა იმავე მეთოდებით, როგორც ამას შევარდნაძე და ასლან აბაშიძე აკეთებდნენ: ცალკეულ რეგიონებში აბსოლუტურთან მიახლოებული პროცენტების ჩვენებით.
- საინტერესოა თქვენი შეფასება: ოპოზიციური გაერთიანება რა მთავარი მახასიათებლით გამოირჩევა? რას ეფუძნება იგი?
- ეს გაერთიანება თავის დროზე შეიქმნა არა არჩევნებზე ერთად წასასვლელად, არამედ 2008 წლის გაზაფხულზე საპარლამენტო არჩევნების ჩატარების მისაღწევად. ამიტომ, ეს ძალიან ფართო გაერთიანება იყო. მაშინ საპრეზიდენტო არჩევნებზე არც ვფიქრობდით. ეს სააკაშვილის მიერ იყო საზოგადოებისთვის თავს მოხვეული. ამიტომ, ჩვენ იმ მომენტში - ნოემბრის შუა რიცხვებში ძალიან მძიმე არჩევანის წინაშე ვიყავით: ამ არჩევნებზე ერთად წავსულიყავით თუ ჩვენი პოლიტიკური ხედვების შესაბამისად; მრავალრიცხოვან ბლოკებით თუ - პარტიული სიებით. ვფიქრობ, რომ სწორად გავიაზრეთ: საზოგადოება ამ კონკრეტულ შემთხვევაში ელოდა, რაც შეიძლება, ფართო ერთობას. ამასთან, საპრეზიდენტო არჩევნების ფორმატი ამის საშუალებას იძლეოდა.
ამასთან, საპრეზიდენტო არჩევნებზე ოპოზიციურ გაერთიანებაში შესულ ყველა პოლიტიკურ ძალას ჰქონდა საერთო მიზანი - პრეზიდენტის ინსტიტუტის გაუქმება.
- და არა სააკაშვილის წინააღმდეგ ბრძოლა?
- სააკაშვილის წინააღმდეგ ბრძოლა არის ერთი - თავისთავადი ამოცანა, მაგრამ ამ ბრძოლის პარალელურად (თუ - ამასთან ერთად), გვქონდა ჩვენი ხედვა: მიგვაჩნდა და დღესაც მიგვაჩნია, რომ საქართველოში პირდაპირი საპრეზიდენტო არჩევნები არ უნდა ტარდებოდეს. მაგრამ, ვინაიდან ეს გამოწვევა იყო, ჩვენ მივიღეთ ეს გამოწვევა. კიდევ ვიმეორებ: ჩვენი მთავარი მოთხოვნა იყო საპარლამენტო არჩევნები; ამ გზით ვგეგმავდით უმრავლესობაში მოსვლას, საკონსტიტუციო რეფორმას და საპრეზიდენტო არჩევნების ჩატარებაზე უარის თქმას. ამიტომ, იმ მომენტში, როცა გაჩნდა სხვა ამოცანაც - უშუალოდ საპრეზიდენტო არჩევნების ჩატარება - ჩვენ მივიღეთ მასში მონაწილეობის გადაწყვეტილება და ასეთი როლისთვის შევარჩიეთ, ჩემი აზრით, საუკეთესო კანდიდატი - ლევან გაჩეჩილაძე.
გაერთიანების მომავალს რაც შეეხება: პოლიტიკურ ძალებს შორის კონსტრუქციული ურთიერთობები ჩამოყალიბდა. ამ ეტაპზე ნაადრევია იმაზე საუბარი, ერთად გავალთ თუ არა საპარლამენტო არჩევნებზე.
- უფრო ზუსტად?
- შესაძლოა, იყოს ტაქტიკური მონახაზი ფართო ერთობის; შეიძლება, იყოს რამდენიმე გაერთიანება, რომლებიც ჯამურად მეტ შედეგს და ეფექტს მოგვცემენ. ეს საკითხები, ალბათ, უახლოესი ერთი თვის განმავლობაში გაირკვევა.
- მაგრამ, თუ საარჩევნო ადმინისტრაცია პარიტეტის საწყისებზე არ დაკომპლექტდება?
- მიგვაჩნია, რომ დაკომპლექტდება.
- ხელისუფლება ხშირად მიანიშნებს პატარკაციშვილის სცენარზე. რა მექანიზმები გაქვთ იმისთვის, რომ თავიდან აირიდოთ ყველანაირი პროვოკაცია?
- მთავარი მექანიზმი არის განჭვრეტის უნარი, ჩვენი სიმართლე, ჩვენი ქმედებების კანონიერება და გამჭრიახობა იმის გასააზრებლად, თუ საიდან უნდა ველოდოთ საფრთხეს. დიდი ხანია, ჩვენ ამ რეჟიმში ვცხოვრობთ.