03 апреля, 2011

"ხმამაღლა არ ვსაუბრობდით, მაგრამ ყოველთვის ვმოქმედებდით"

"რეზონანსი" - "მთელი კვირა"
22 თე, 2010


ფიქრია ჩიხრაძის თქმით, "ალიანსმა" ერთობის ახალი ფორმულის შეთავაზებით, უბრალოდ, ღიად გააკეთა ის, რასაც მანამდე კულუარული მოლაპარაკებებით აკეთებდა
გასულ კვირას "ალიანსი საქართველოსთვის" ლიდერმა - ირაკლი ალასანიამ საყურადღებო განცხადება გააკეთა: "ბუნებრივია, რომ ჩვენ საერთო ძალებით, ერთიანი კანდიდატით უნდა გავიდეთ ამ არჩევნებზე. ამ შემთხვევაში, გამარჯვება გარდაუვალი იქნება. ამიტომაც, ჩვენ ამ ერთობას აუცილებლად შევქმნით".
"მთელი კვირა" "ალიანსი საქართველოსთვის" ერთ-ერთ ლიდერს - ფიქრია ჩიხრაძეს ესაუბრა.
- ჩვენ ერთგვარი დილემის წინაშე დავდექით და გადავწყვიტეთ, კიდევ ერთხელ მოვუწოდოთ პოლიტიკურ სპექტრს: თუკი ვინმე მიიჩნევს, რომ ალიანსის გზის, მისი პოზიციის გაზიარება შეიძლება, ჩვენ მზად ვართ, უფრო მსხვილი ერთობა შედგეს და ასე გავიდეთ ადგილობრივ არჩევნებზე. მაგრამ ცხადია, მსხვილ ერთობასაც აქვს საზღვრები. ჩვენ ნოღაიდელისგან ფუნდამენტალურად განსხვავებული მსოფლმხედველობა გვაქვს და არ ვაპირებთ, მასთან თანამშრომლობით პასუხისმგებლობა ავიღოთ - თუნდაც, საზოგადოებაში ყველა ოპოზიციური ძალის გაერთიანების მოთხოვნილება არსებობდეს. ყველას გაერთიანება არასოდეს ხერხდება და ეს ამჯერადაც უნდა გამოვრიცხოთ.
მიმაჩნია, რომ ოპოზიციურ ერთობას მაშინ აქვს აზრი, თუკი ის მკაფიო ალტერნატივის სახით არის ჩამოყალიბებული. მექანიკური ერთობის იდეა რომ არ მუშაობს, ამაში უკვე არაერთხელ დავრწმუნდით.
- მაინც რას გულისხმობდით, როცა რამდენიმე დღის წინ  ერთობის აუცილებლობაზე განაცხადეთ?
- ეს შეთავაზებაა. ჩვენც ხომ გვთავაზობენ მუდმივად, პრაიმერში მონაწილეობა მიიღეთო?
- გამოდის, რომ თქვენს განცხადებას ყურადღება არ უნდა მივაქციოთ?
- ეს ნამდვილად არ იყო სიახლე. ჩვენ, უბრალოდ, ღიად გავაკეთეთ ის, რასაც კულუარული მოლაპარაკებებით ამ ხნის განმავლობაში ისედაც ვაკეთებდით.
ადგილობრივ არჩევნებთან დაკავშირებით ვცდილობდით, კონსულტაციები გაგვემართა შედარებით თავსებად პოლიტიკურ სუბიექტებთან. სოზარ სუბართან კონსულტაციების გამართვა ამის ცხადი მაგალითი იყო.
ასევე, შეთავაზებები გვქონდა "კონსერვატორებთან". ვინაიდან ვიცოდით, რომ ისინი არჩევნებში მონაწილეობის მიღებას აპირებენ, მასში ალიანსთან ერთად მონაწილეობას - ჩვენი ერთობლივი გუნდით წარდგენას ვთავაზობდით. მაგრამ მათ ამ წინადადების მიღებისგან თავი შეიკავეს.
ჩვენგან, ასევე, შეთავაზება ჰქონდა კობა დავითაშვილს, ოღონდ - პერსონალური ხასიათისა. ვაპირებდით, მისთვის მიგვეცა შესაძლებლობა, რომ იმ არეალში, სადაც ის კენჭისყრას გადაწყვეტდა, ჩვენგან კონკურენტი არ ჰყოლოდა. მაგრამ "კონსერვატორებმაც" და დავითაშვილმაც რაღაც ცალკე ერთობა ჩამოაყალიბეს და ორივემ თავისი კანდიდატურა დაასახელა.
ამავე დროს, მედია მუდმივად ავრცელებდა აზრს, რომ ალიანსმა ოპოზიციას სიურპრიზი მოუწყო. და ეს, სამწუხაროდ, ოპოზიციის წარმომადგენლებიდან არავის გაუპროტესტებია. ვერ ვიტყვი, რომ რამე შევუთანხმეთ გია მაისაშვილს - ამის არანაირ აუცილებლობას არ ვხედავდით. მაგრამ ყველა იმ პოლიტიკურ ძალას, ვისთანაც კოლეგიალური ურთიერთობა გვაკავშირებდა, კონსულტაციები გვქონდა. საერთოდ, ჩემთვის გაუგებარია, რატომ არ ითვლება ერთობად სამპარტიული ერთობა, რომელიც კანდიდატურებს ასახელებს, და რატომ ითვლება ერთობად ის ძალები, რომლებიც არა საერთო, არამედ მხოლოდ საკუთარ კანდიდატურებს ასახელებენ. საქართველოში, სამწუხაროდ, ეს სტერეოტიპი მუშაობს.
მიგვაჩნია, რომ საუკეთესო კანდიდატურები გვყავს. მაგრამ, თუკი ჩვენი კოლეგების სურვილი იქნება, საერთო კანდიდატზე შევთანხმდეთ, ასეთ შემთხვევაში მოლაპარაკების მაგიდასთან წინასწარი ახირებებით წასვლას არ ვაპირებთ: მზად ვართ, მოვისმინოთ სხვების არგუმენტაციაც.
- აქამდე თქვენ ამაზე არაფერი გითქვამთ. ახლა რა შეიცვალა?
- ხმამაღლა არ ვსაუბრობდით, მაგრამ ყოველთვის ვმოქმედებდით.
- იმის თქმა გინდათ, რომ შესაძლებელია, ამ საკითხთან დაკავშირებით კომპრომისზე წახვიდეთ?
- თუკი იქნება უკეთესი შემოთავაზებები. ჯერჯერობით, უკეთესი შემოთავაზება არ მომისმენია.
ჩვენ ძალიან რისკიან ბრძოლაში ჩავერთეთ. როცა პოლიტიკაში ხარ, რისკის გაწევის უნარიც უნდა გქონდეს. ძალიან ბევრი ხელისშემშლელი ფაქტორი რომ არსებობს, ამას ვხედავთ. მაგრამ რომ არ გქონდეს გამარჯვების იმედი, რა თქმა უნდა, ასეთ ბრძოლაში შესვლას აზრი არ ექნებოდა.
- სოციოლოგიური კვლევები აჩვენებს, რომ ვერ გაიმარჯვებთ, თუკი ოპოზიციური ხმები გაიფანტება. თქვენი იმედი რას ეფუძნება?
- დარწმუნებული ვარ, რომ ალიანსს დამოუკიდებლადაც შეუძლია გამარჯვების მიღწევა. მაგრამ, ამავე დროს, პრობლემას ქმნის ამომრჩევლებში არსებული ნიჰილისტური განწყობა და ოპოზიციური ხმების გაფანტვის ალბათობა. სწორედ ამიტომ ვაცხადებთ, რომ მზად ვართ ერთობისთვის, ანუ - უფრო მეტად გახსნილობისთვის. ამით დამატებით მექანიზმებს ვეძებთ, რათა ამომრჩეველთა ნიჰილიზმიც დაიძლიოს და არჩევნებზე ოპოზიციური ხმებიც არ გაიფანტოს.
- ამბობთ, რომ დამოუკიდებლადაც შეგიძლიათ არჩევნებში ხელისუფლებაზე გამარჯვება. სოციოლოგმა იაგო კაჭკაჭიშვილმა თქვენ დაგიდოთ სოციოლოგიური კვლევის შედეგები, რომლის მიხედვით ხელისუფლება ახერხებს, არჩევნებზე 30% გაინაღდოს. თქვენი რეიტინგი კი, ისევე, როგორც სხვა პარტიებისა, არ გაზრდილა. ამაზე რას იტყვით?
- ალიანსში ხანდახან გვეჩვენებოდა, რომ ჩვენი შესაძლებლობები უფრო მეტი იყო; რომ უფრო მეტი მხარდაჭერა გვქონდა, ვიდრე ეს იაგო კაჭკაჭიშვილის მიერ გაკეთებულ კვლევებში ჩანდა. მაგრამ ამ კვლევებმა  დროში დაგვიმტკიცა, რომ ისინი სანდოა. ამ ეტაპზე, ჩვენ, რა თქმა უნდა, არ გვაქვს გადამწყვეტი უპირატესობა, მაგრამ ირაკლი ალასანიას და ალიანსს აქვს სერიოზული რეიტინგი იმისთვის, რათა კარგად დაგეგმილი კამპანიის შემთხვევაში, ის განსხვავება, რომელიც მმართველ პარტიასა და ალიანსს შორის არსებობს, დაიძლიოს.
ჩვენ მოქმედება ჯერ არ დაგვიწყია. სახელისუფლებო გუნდს კი უკვე ოთხი თვეა, გამალებული კამპანია აქვს გაჩაღებული. საგულისხმო ის არის, რომ ხელისუფლების ჰიპერაქტიური კამპანიის მიუხედავად, დახარჯული დიდძალი ფულის მიუხედავად, გიგი უგულავას რეიტინგმა ვერაფრით აიწია 29-30%-ის ზემოთ. დარწმუნებული ვარ, ჩვენი სწორად მოქმედების შემთხვევაში უგულავას რეიტინგი აუცილებლად დაიწევს. თუკი გულზე ხელებს დავიკრეფთ, ცხადია, არაფერიც არ მოხდება.
- ალასანია არ აწარმოებს აქტიურ წინასაარჩევნო კამპანიას და ეს, ერთგვარად, ქმნის შთაბეჭდილებას, რომ ის შტატების ინსტრუქტაჟის მიხედვით მოქმედებს.
- ასეთი ინსტრუქტაჟი არ არსებობს. შემიძლია გითხრათ, რომ ჩვენ ამერიკელი კონსულტანტები საარჩევნო კამპანიის დაგეგმვაში გვეხმარებიან და ისინიც გვეუბნებიან, რომ ამ კულუარულ მოლაპარაკებებს და ქმედებებს ჯობს, აქტიურ ქმედებაზე გადავიდეთ. დიდი იმედი მაქვს, რომ უახლოეს ხანებში ამ ნაბიჯს გადავდგამთ.
- არჩევნების გაყალბების შესაძლებლობებს რა მნიშვნელობას ანიჭებთ?
- ვითვალისწინებთ. გაყალბების შესაძლებლობები ერთგვარად ჩანს უგულავას რეიტინგშიც. ის ადამიანები, რომლებიც საბიუჯეტო დაწესებულებებში მუშაობენ, როგორც წესი, სოციოლოგიაში ხელისუფლების მხარდაჭერ პოზიციას აფიქსირებენ. მაგრამ არ არსებობს გარანტია, რომ არჩევნებზე ისინი აუცილებლად ხელისუფლებას დაუჭერენ მხარს. თუკი ხელისუფლებისთვის მობილიზებულ ხმებს ძლიერ ალტერნატივას აჩვენებ, მან შეიძლება ძალიან ადვილად შეიცვალოს მიმართულება. იმედი მაქვს, რომ ჩვენ ამას მოვახერხებთ.
- ყალბ სიებს როგორ შეებრძოლებით?
- ბევრი მექანიზმი გვაქვს შემუშავებული, რათა მას გავუმკლავდეთ. გაყალბებებს სრულად რომ ვერ აღვმოფხვრით, ეს ნამდილად ვიცით, მაგრამ გაყალბების დონე მნიშვნელოვნად უნდა შევამციროთ.
- არჩევნებთან დაკავშირებულ არაერთ მნიშვნელოვან საკითხზე თქვენ ვერ შეძელით, გარღვევა მოგეხდინათ. ამჯერად რას ეფუძნება თქვენი ასეთი განაცხადები?
- თუ ასეა, მაშინ გულზე ხელები უნდა დავიკრიფოთ. "ენ-დი-აის" ჯგუფში ჩვენმა მუშაობამ ხელისუფლების სახე გამოაჩინა. იმ ჯგუფში ჩვენ რომ არ გვემუშავა,  ეს პროცესი საერთაშორისო საზოგადოების თვალში აღქმული იქნებოდა, როგორც შეთანხმება ხელისუფლებასა და ოპოზიციას შორის. ვინც ამ შეხვედრებში მონაწილეობას არ მიიღებდა, მასთან დაკავშირებით დასავლეთი იტყოდა, რომ ამ ძალებს არც საკუთარი მოსაზრებები აქვთ პრინციპული მნიშვნელობის საკითხებზე და არც - პრეტენზიები ხელისუფლების მიმართ.
- ანუ, "ენ-დი-აის" ჯგუფში მუშაობით თქვენ ერთგვარი მოვალეობა მოიხადეთ?
- არა. ჩვენ საერთაშორისო საზოგადოების წინაშე ამ ხელისუფლების ლუსტრაცია მოვახდინეთ.
- და რას ცვლით ამ ლუსტრაციით? რას ცვლის ეს პოლიტიკური თვალსაზრისით?
- სააკაშვილს ლუსტრაცია შეიძლება, არც სჭირდებოდა, მაგრამ  მას ძალიან დაუმძიმდა ვითარება საგარეო მხარდაჭერის თვალსაზრისითაც.
პოლიტიკური თვალსაზრისით კი შეიძლება შეიცვალოს ის, რომ თუკი სააკაშვილი მომავალ არჩევნებში ცუდად მოიქცევა, მას, გასული არჩევნებისგან განსხვავებით, დასავლეთიდან უპირობო მხარდაჭერა აღარ ექნება.
- რამდენიმე დღის წინ რესპუბლიკური პარტიისა და "ახალი მემარჯვენეების" ლიდერებმა განაცხადეს, რომ ისინი ნოღაიდელთან თანამშრომლობას არ აპირებენ. რატომ დასჭირდა ალასანიას, ამ განცხადების შემდეგ დაეზუსტებინა, რომ ისიც ემიჯნება ყოფილი პრემიერის პოლიტიკურ ძალას? აქამდე ალასანია აცხადებდა, რომ ის მზად იყო, ეთანამშრომლა ყველა ოპოზიციურ ძალასთან. გარეშე თვალისთვის იქმნება შთაბეჭდილება, რომ ალიანსში ურთიერთშეთანხმების პრობლემა არსებობს. რატომ დაასწარით ალიანსის ლიდერს განცხადების გაკეთება?
- არა, რატომ დავასწარით? ჩვენ გამოვეხმაურეთ ალიანსის ლიდერის წინა დღის განცხადებას. მინდა გითხრათ, რომ სახელისუფლებო მედია ავრცელებდა ინფორმაციას, თითქოს "რესპუბლიკელები" და "ახალი მემარჯვენეები" მარჯანიშვილის თეატრში გამართულ შეხვედრას არ ვესწრებოდით.  არც ერთ სატელევიზიო კადრში არ გამოგვაჩინეს - მიუხედავად იმისა, რომ პირველ რიგში ვისხედით ჩვენც და "რესპუბლიკელებიც". და საუბრობდნენ იმაზე, რომ იქ მხოლოდ ლევან გაჩეჩილაძე იმყოფებოდა.
- მაგრამ რატომ დასჭირდა ალასანიას იმის  განმარტება, რომ ნოღაიდელთან თანამშრომლობას არც ის ემხრობა?
- იმიტომ, რომ მედიაში ატყდა ასეთი ვაი-უშველებელი. ალიანსში ნამდვილად გვაქვს იმის შესაძლებლობა, რომ მასში შემავალმა პოლიტიკურმა ძალებმა ფუნქციები გადავინაწილოთ. ყოველთვის შეიძლება, რომ მე ბევრად უფრო მწარედ ვთქვა რაღაც, ვიდრე ალასანიამ ან სუბარმა.

Комментариев нет:

Отправить комментарий